Muhammad Rasulullah

Nabi Muhammad SAW. (bahsa Arab:محمد‎, Muḥammad) lahé di Meukah bak tanggay 12 Rabi’ul Awwal lam thôn Gajah atawa bak tanggay 20 Beuleuën Peuët thôn 571 Maseuhi. Ayah geuh Abdullah, mak geuh Aminah.

Watèë Nabi Muhammad saw. mantöng umu 3 buleuën lam kandông, ayahgeuh, Abdullah ka geutinggay dônya. Watèë umu gopnyan nam thôn, Aminah pih ka geuwoë bak Allah, ka yatim meuntuy Nabi Muhammad SAW, teuma dudoë nibak nyan geucök nabi lé Abdul Muththalib geujaga geusatöh.

Barô lapan thôn umu di nabi, ka meuninggay Abdul Muththalib. Teuma lheuëh nyan nabi geutanyoë neujaga léAbu Thalib, nabi neusatöh leubèh bak aneuk droë. Thôn lahé nabi geupeunan thôn gajah kareuna bak thôn nyan trôh teuka keunan u Meukah saboh kawan teuntra gajah Raja Abrahah nibak nanggroë Habsyi nyang na leubèh kureuëng 60.000 ribèë droë, jikeuneuk peu ancô Ka’bah (Baytullah), bak teungöh-teungöh jalan geupu binasa lé Allah Ta’ala ban dum teuntra nyan deungön geupeurintah bak cicém (ticém) Ababil untôk peuancô Abrahah ngön teuntrajih.

Lagèë nyang na lamAl-Qur’an, bakSurat Al-Fil:

أَلَمۡ تَرَ كَيۡفَ فَعَلَ رَبُّكَ بِأَصۡحَـٰبِ ٱلۡفِيلِ . أَلَمْ يَجْعَلْ كَيْدَهُمْ فِي تَضْلِيلٍ . وَأَرۡسَلَ عَلَيۡہِمۡ طَيۡرًا أَبَابِيلَ . تَرۡمِيهِم بِحِجَارَةٍ۬ مِّن سِجِّيلٍ۬ . فَجَعَلَهُمۡ كَعَصۡفٍ۬ مَّأۡڪُولِۭ(1-5 :الفيل)

Areutijih: “Peuë hana takalön pakri ban tuhan gata (Allah) geupeugöt tindakan ateuëh teuntra gajah? Bukönkeuh Allah nyang peujeuët tipèë daya ureuëng nyan (teuntra gajah) jeuët keu seusat (sia-sia)? Ngön geukirém ateuëh ureuëng nyan cicém Ababil nyang sép that le. Nyang jirhom lé cicém nyan ateuëh ureuëng nyan deungön aneuk bateë nibaknuraka Sijjiil. Maka luh nyan laju neupeujeuët lé Allah ureuëng nyan ka lagèë ôn kayèë nyang jipajôh lé ulat”.

Masa ubeut-ubeut nabi Muhammad, buët siuroë-uroë nakeuh geupeurabé kamèng atra ureuëng-ureuëng di Meukah, bak watèë umu 12 thôn ka mulai geujak meukat-meukat ngon Abu Thaléb.

Bak Umu 25 thôn, geumeunikah ngon Siti Khadijah, salah sidroe ureunëng inong bangsawan di kuta Meukah. Umu 35 thôn Rasulullah rôh ikôt lam beuët ramè-ramè /gotong royong jak peu saneut ka’bah, seubab ka’bah watèënyan ka reuleh sampoë payah puga keulayi.

Oh watèë peuduëk Hajar Aswad bak teumpat sot, na karu-karu antara ureuëng-ureuëng rayeuk disinan, tapi ngon bijaksana nyang na bak Muhammad, masalah nyan seuleusoë ngon hana payah meurô-rô darah.

Nabi Muhammad geu lanték lé Allah bak umu 40 thôn, bak 3 thôn phôn geupeutrôh da’wah Islamiah ngon geu som-som, geujak nibak saboh rumoh keu rumoh la’én. L’huh trôn parèntah da’wah terang-terangan, Rasulullah pih geu dakwah, geupakat tamong Islam ngon cara lahé, hana geusom-som lé.

Seugohlom hijrah, Rasulullah geu parèntah lé Allah untôk Isra’ ngon Mi’raj/Mi’reut. Isra’ nakeuh meujak bak watèë malam nibak Masjidil Haram Meukah trôh Masjidil Aqsha (Palèstina), meunyo Mi’raj nyan keuh ék u langèt tujôh sampoë trôh u Sidratul Muntaha, lam Israk Mi’raj nyan Rasulullah geuteurimong parèntah peudong seumayang limong boh watèë si uroë si malam.

L’huh peuristiwa Isra’ ngon Mi’raj nyan Rasulullah hijrah u Madinah, disidéh keuh Rasulullah geu peuluwah lom da’wah Islamiyah.

10 thôn oh lhuh nyan Rasulullah neuwoë bak Allah, ummat nyang neukeubah ka lam duka cita. Sabeuëb watèë nyan ka gadoh sidroë pemimpin donya.

Ngon geukirém Nabi Muhammad seubagoë Rasul, lethat meu ubah hudép manusia, ureuëng inong geupeu mulia, ureuëng lamiët le nyang meurdèhka. Hudép ka meu atô, ummat ka hana lé lam kufô. Meuseubab nyan keuh patôt that tanyoë ta ingat ngon ta keunang keu Baginda Rasulullah Muhammad SAW, deungon cara ta meuseulaweuët, ta beuët kitab-kitab seujarah Nabi, beu le ta meuseudeukah, ta meukhanduri ngon ta peu le ibadat, hana meuchéh bak beuleuën meulôd mantong, adak bak beuleuën la’én jroh cit ta meukhanduri. Ta peu le syi’ar-syi’ar Islam, ta peugot acara beuët seumeubeuët, ceuramah agama ngon la’én-la’én nibak nyan. Meuroë hakikat ta peuingat uroë lahé nabi nakeuh ngon ta peu le ibadat, seulaweuët, beuët kitab-kitab tarèh/seujarah Nabi ngon peu la’én lom.

Ta peu ingat uroë lahè Nabi bukon keu meu hura-hura, meuseunang-seunang tapi keu peuingat keu geutanyoë dumna susah payah Rasulullah bak geu peujuang Agama Allah, sampoë katrôh bak geutanyoë….

WASSALAM.