Contoh Pidato Dalam Bahasa Aceh

Assalamu’alaykum Wr Wb.
Hamdan Syukran lillah, Shalaatan wa salaaman ‘ala Rasulillah, wa ‘ala aalihi washahbihi wa maw walah.

Nibak mula phôn, mandum pujoë meuwoë keu Allah, Tuhan nyang that rayek, nyang that meugah ban sigom donya. ‘oh l’huh nyan seulaweuët saleuëm keu pang ulèë ‘alam, Rasul janjôngan Muhammad al Mushthafa, nyang ka utôh lé po teuh Allah keu mandum ummat manusia. Teuma l’huh nyan keu sahbat seureuta keuluarga gopnyan, nyang that sunggôh bak geu bantu Nabi geutanyoë bak geu peutheuën ngon geu peuluwah agama Èseulam. Hana teuwo chit seulaweuët saleuëm keu mandum ‘alim ‘ulama, nyang away-away ngon nyang dudoë-dudoë nyang mu’tabar.

Nyang ulôn tuwan peu muliya; ureuëng-ureuëng chik kamoë, (bapak Bupati atawa Camat atawa la’én2). Hana tinggai chit horeumat ta’dziëm lôn tuwan keu mandum rakan nyang ka meusapat lam majeulih nyoë.

Neu peu idin keu ulôn tuwan, siat lôn tuwan dong di keuë ureuëng-ureuëng chik kamoë, rakan-2, aduën ngon adoë mandum….
Sabab Na padum-padum boh hay nyang keuneuk peu sampoë. Nyang bahwasajih nyoë katrôh geu tanyoë bak masalah “keusèhatan ngon meu ubat”. Tutô Keusèhatan nakeuh geucok nibak bahsa Arab. Nyakni “Shihah” (صححة).

Keusèhatan nakeuh saboh peukara nyang that peunténg, saweuëb nyan keuh Imum Syafi’i geu peugalak bak geu tanyoë beu tatém mita duwa bagoë èleumèë, nyankeuh èleumèë Fiqah keu shah ibadah, ngon èleumèë keusèhatan atawa kedokteran supaya sihat badan, mangat mudah bak ta meu udép lam ibadah.

Kawôm muslimin nyang geu bri rahmat lé Allah, Rasulullah SAW na neupeu ubat para sahabat, na riwayat nyang peugah, nabi geutanyoë neu plè/bôh ubat bak leut/luka saiyidina Abu Bakar RA, sabab jikap lé uleuë. Na lom la’én2 riwayat.